chit-phiN tioh Tai-lam bun-hak-chiong te 2 mia ~ OH YE~~
部長真煩惱
部長 khiā tī窗 á 門邊，看外口 1、200 ê 人 gia̍h 牌 á、布條 á tī樓 kha 一直 huah。
「部長出--來！」「部長出--來！」
「台灣人是人，m̄是蟲！」
「Mài thún 踏台灣人 ê 母語！」
「Gún beh 母語教育，無 ài 殖民教育！」
I 想講 to 派祕書落去 kā in 講 i 出去開會，suah hō͘ in 當做 su̍t-á-phí bih--起-來，無 beh 出--來。頂頭交代--落-來 ê sit 頭 iáu 舞 buē好勢，koh hō͘ in tsia 舞台語--ê 一直亂，亂 kah 頭疼 kah beh 死！ I tsíng-thâu-á tī『太陽穴』一直 luán，luán 看 tsia ê tāi-tsìē消--去-無.....
電話 hō͘外口 hì-hè 叫 ê 聲 khàm--過，liang 20 幾聲無人接，祕書直接 lòng 門，lòng beh 10 幾下，部長 tuì 內底 kā門開--開，祕書頭伸入去問講 kám ē-sái 報告--1-下，部長 tìm 頭，祕書 the̍h 1 tsí A4 ê資料入--去。
「樓 kha 是...」
「hō͘ in 吵 kah 電話 lóng 聽無，ka-tsài lí 有 lòng 門，siáⁿ-mih tāi-tsì？」
「Beh kā lí報告樓 kha hia 是 siáⁿ-mih 人。」
「Ta̍k kái to leh hia iau 飽吵，tsit kái koh beh 討 siáⁿ siâu？」
「Tsit pái 是台南 S 大學 ê C 教授招人來--ê，lóng 是舞台語文--ê，講國校 á 台語課 2 點鐘 kiu 做 1 點鐘無夠，koh teh 討 in he 台語考試 ê 錢。」
「Án-ne niâ，m̄是 koh 有 siáⁿ-mih 蟲--ê？」
「In 講 lán buē-sái 用『閩南語』，因為『閩』內底有 1 隻蟲。In 講 in 是人 m̄是蟲。」
「Ah 無是 beh án-tsuáⁿ 講！！」部長 ìn kah 火 tsiok 大 ê 形。
「In 講...... in 是台灣人... m̄是『閩南人』....」
「Lán lóng 『中國人』--ah！！ M̄知 in teh huah sáⁿ-siâu！」
日頭 tsiok 炎， pha̍k kah ta̍k ê人 kui身軀 tâm-kô͘-kô͘，C 教授 gia̍h mài-khuh tī頭前 huah：「In kā lán 考試 ê 錢 thâi 5000 萬--去！ Tō是 beh hō͘ lán 辦 buē起--來 tsiah ē歡喜，koh kā國校 á 台語課 kiu kah tshun 1 點鐘，in 一定想講禁禁--leh khah kui 氣！Koh 用『閩南語』來 kā lán phì-siùⁿ，lán 是人，是台灣人 m̄是蟲！Lán台灣人 suah ài án-ne hō͘ in 蹧躂！台灣人 lí kám buē tu̍h-lān！部長若無出--來 kā lán 交代，lán tō kā蟲 lóng phiaⁿ-phiaⁿ hō͘部長食！Hō͘ i 食 kah phòng-sai-sai！Án-ne 好--無！！！」
200 ê 人做伙 huah 好！有人暢 kah 跳--起-來！有人 pho̍k-á一直 phah！
「部長緊 kā mé 死--出-來，算 3 聲無出--來 lí tō知！！」
警察擋 tī人頭前，驚有人衝--過，ta̍k ê lóng 憂頭結面，m̄知 in beh khian siáⁿ-mih 蟲，開始 the̍h 手巾 á、面巾 kā面 tsa̍h--起-來，tsiok 驚蟲 suan 入去衫內底。
現場 ê 人 tuè C 教授算！
「1」
「2」
「3」
「蟲 sa--來，kui 箱 lóng sa--來， kia̋ⁿ 日來 kā in 上課，hō͘ in 知影 siáⁿ-mih 是蟲，siáⁿ-mih 是人！」
1 台貨車 tuì 中山南路駛--來，tshah tī抗議現場頭前，5、6 ê S 大學 ê 學生 á，1 人 tuì 車頂 mo͘h 1 kha 紙箱 á 落--來，5、6 箱排 tī賊頭 kap C 教授 tiőng-á。賊頭 ê 隊長緊走來 beh kap C 教授參詳，hō͘ 3、4 ê 學生 á 擋--起-來。
「隊長 lí 免來，lí 去叫 lín 部長出--來 khah 實在，m̄-koh buē赴--ah，我 tsit-má tō beh hō͘部長知影蟲是生做 siáⁿ-mih 款。」
C 教授 tuì 箱 á 內 mi 1 把，gia̍h kuân-kuân，kā眾人講：「Tse tō是蟲！台灣人 m̄是蟲！」
講 suah tōǹg 部長辦公室 hit 向 khian--過-去，1 把蟲 tī天頂四散，有 ê kuân 有 ê kē，賊頭 iáu 未 hō͘蟲 khian--tio̍h tō緊張 kah phi̍t-pho̍k 跳，去抗議 ê 人 ta̍k ê lóng tuì箱 á 內 me 出來 khian，khian kah 部長辦公室廳外口 ê 園 á kui thô͘-kha lóng 蟲，賊頭 hō͘蟲 khian tio̍h 驚 kah 哀哀叫，kui 身軀一直 pué，想 beh kā蟲 pué hō͘清氣，m̄-koh tsiok tsuē，án-tsuáⁿ pué to pué buē lī。
「Tse tō是蟲，屎 ha̍k-á蟲！Án-ne 知影--無？」C 教授講了 pho̍k-á聲 pìn-piàng 叫。部長看 tio̍h 樓 kha 警察 hō͘蟲驚 kah phi̍t-pho̍k 跳，頭 koh khah 疼，祕書無 lòng 門 tō tsông--入-去。
「In the̍h 屎 ha̍k-á蟲烏白 khian beh án-tsuáⁿ？Kám beh『統統抓起來？』」
「『抓起來？？』beh 辦 siáⁿ-mih 罪？亂 khian pùn-sò？？苦毒動物 á？？」
「In án-ne tsiok 超過，kā部長當做 siáⁿ-mih 人！」
「無法度，kā in 辦 tse siuⁿ 細條，koh 忍--1-下，看 in koh beh 出 siáⁿ-mih 怪招。」
祕書 1 kho͘面屎 tu̍h-tu̍h 行--出-去。頭殼一直 luán，luán kah 『太陽穴』nài--落-去，強 beh 破--去 ê 款。
立法院罰 khiā
Hông 抗議了 1 禮拜，tāi-tsì iáu buē suah，C 教授 tshuē kui 立法院上 tshiah ê tsa-bó͘立法院委員，點名叫部長去台 á 頂罰 khiā。
「是 án-tsuáⁿ 台語考試 ê 經費 thâi kah tshun 1 sut-á，連買便當 to 無夠！」
「Tse 是....」
「英語考試 9000 萬，中文考試 8000 萬！台語連肉幼 á to 無！」
「我...」
「國校 á ê 台語課 kiu kah tshun 1 節，我教 lí 1 步 khah 緊！」
「Siáⁿ-mih 步？委員。」
「學 lín『蔣總統』禁台語 m̄是 khah 緊！」
「無--lah，gún m̄敢--lah，是...」
「2 節已經 siuⁿ 少--ah，koh kiu 1 節？？？是 siáⁿ？？Lí 講--ah！」
「是... 國校 á ê 老師反應....」
「反應 siáⁿ！Koh 講台灣人是蟲！！！」
「無--lah，m̄-bat 講過台灣人是蟲....」
「Koh 講無！『閩南語』ê『閩』tō是蟲！」
「本來 tō是講『閩南語....』」
「頂禮拜 lí suan 去開會，無看 tio̍h siáⁿ-mih 是蟲，我 kia̋ⁿ 日 tō hō͘ lí知影，人 kap 蟲 toh 位無 kâng！！」
立委 tī lak 袋 á 內 the̍h 1 ê khok-á出--來，蓋開--去，tuì 部長面--e piàⁿ--過-去，1 khok 4、500 隻屎 ha̍k-á蟲，tuì 盒 á 內 hō͘ piàⁿ--出-去，飛 tuì 部長面--e 去。部長驚1 下頭緊 ua̍t tuì邊--á 去，m̄-koh mā是 hō͘蟲 piàⁿ kah kui 面，khiā tī i 邊--á ê 院長 mā hō͘蟲 phùn kah kui 身軀！
「Án-ne lin tō知影台灣人是人 m̄是蟲！」
部長、院長 ê 祕書 kap 助理 kui 陣衝出來 kā in 2 ê圍--起-來，tsiok tshiah ê tsa-bó͘立委 hō͘立法院 ê 警衛 á teh tī thô͘-kha。Tshuì--e huah：「Kā我放--開！」用利劍劍 ê tsíng-kah tuì 警衛 á ê 面一直 niàu！部長緊 kā院長牽--出-去，2 ê 人 hō͘ kui 陣祕書、助理包 ân-ân，âⁿ 去便所，部長 huē失禮 huē buē suah，院長 1 kho͘面屎 tu̍h-tu̍h。
「部長 ê 位坐 buē tsāi，我叫別人來坐....」
「後 kái buē--ah-lah ！」
「Koh 有後 kái？？Lí 上好緊 kā hit kho͘ C 教授 tshiâu hō͘好勢！」
「我知。」
「Koh 有，頂頭交代--落-來 ê sit 頭 māài 顧，若無我院長 mā免坐--ah...」
「我ē連頂 kái hit 條做伙討--轉-來！」
立法院 ê 演講台 hō͘上 tshiah ê 立法院委員，piàⁿ kah lóng 蟲，會 mā開 buē落--去-ah！立法院長叫 ta̍k ê人 lóng 轉--去，散會！
煩惱 siáⁿ？
院長出--去了後，部長 tī便所鏡頭前 khiā beh 10 分，頭殼 ná mo͘h-tah teh ká，認真 teh 想 beh án-tsuáⁿ 討--轉-來，thiaⁿ tio̍h 外口散會人聲，頭 lê-lê 無看路 tō趕緊 tsông--出-去。Tī便所門 kā人 lòng--tio̍h，聽 tio̍h tsa-bó͘哀 1 聲 buē細聲。Tsim-tsiok 看，是 1 ê 20 幾歲 ê tsa-bó͘ gín-á，穿 tsa-bó͘西裝裙，hō͘ lòng 1 下坐 tī thô͘-kha，部長趕緊 kā giú--起-來，tàu khioh 散 tī thô͘-kha ê mn̍gh-kiāⁿ！
「Phái-sè！」
「Ah！我走 m̄-tio̍h pîng--ah！」i 趕緊 beh 便所，suah tsông tuì tsa-po͘͘ hit pîng，tsiah ē hō͘部長 lòng--tio̍h。」
「Lí 是立法院委員 ê 助理？」
「Tio̍h，tú 來上班無外久。Sa 無便所 tī toh 位。」
「我 teh 無閒先來去！」
部長 beh 緊轉去想，beh án-tsuáⁿ kā C 教授報鳥鼠 á 冤！
「等--e！ Lí ê mn̍gh-kiāⁿ lak--去-ah！」
Hit ê 助理 kā部長 huah，手 tsiⁿ 1 ê phue-lok-á入去部長西裝 ê lak 袋 á。部長想講 i 無 lak mn̍gh-kiāⁿ，tsit ê tsa-bó͘ suah tsiⁿ 1 ê phue-lok-á hō͘--i， m̄知是 sáⁿ-siâu，tng beh kā問，hit ê tsa-bó͘ tō講話--ah。
「Mài 煩惱，轉去 tsiah 看！」
講 suah ná 旗 á hō͘風 siàn--tio̍h，uat--過 tō tuì外口行--去，sán-thiu ê 身軀 lú 行 lú 遠，kuân-tah 鞋尖尖 ê 鞋底 tsha̍k kah 大理石地磚強 beh pit--開，khi-khi-kho̍k-kho̍k ê聲強 beh kā部長 ê 耳 á tsha̍k--破！
Hit ê 怪 tsa-bó͘ê phue-lok-á khǹg tī辦公室桌頂，已經 tsiok siān--ah，koh 走 1 ê siáu-tsa-bó͘來亂，內底 m̄知 sáⁿ siâu。金 sih-sih ê 拆 phue 刀 á kā phue-lok-á liô--開，內底 kan-na 1 張 mè-sih hiah 大張 ê 紙，頂頭寫 3 tsuā。
「C 教授 ê tāi-tsì免煩惱，我 tī 101 大樓 102 樓，kā電梯 me-me 講 tō知--ah。」
後壁 koh 畫 2 粒紅紅 ê 心。若無寫「C 教授」可能ē想講 hō͘幼齒--ê 招--tio̍h。
部長看了，隨 kā祕書講 i beh 先轉厝。
102 樓
部長piàⁿ 轉厝--e，換 1 su 看--起-來無 sîng 大官 ê 普通衫，戴 1 頂釣魚帽 á，路邊 tsa̍h 1 台計程車。上車 tō kāùn-tsiàng 講 beh 去台北車頭，坐 kàu 台北車頭 tī忠孝東路落車，koh tsa̍h 1 台，坐去台灣大學，tsiah koh tsa̍h 1 台，坐去 101 大樓。Tī信義路落車，3 步做 2 步行 tsiok 緊入去大樓。
電梯頭前 tsiok tsuē人等 beh 坐，部長 tī hia 等 kah 人 khah 少 tsiah 入--去，hit tsuā kan-na 5、6 ê 人坐，等人 lóng 落了，電梯小姐問i beh 去幾樓。
「102 樓，多謝。」
「了解，等--e tō kàu--ah！」電梯小姐講輕輕 ê 聲講 kah tsiok 好禮。
電梯小姐講了無 tshi̍h 半粒，電梯先 tong-tiāⁿ，雄雄ǹg 樓 kha lak--落-去，緊 kah 耳空ē ki-ki 叫。部長 kha-tsiah-phiaⁿ phīng tī壁--e，手出力 huāⁿ--leh，人強 beh 飛--起-來 ê 款，心肝 phi̍t-pho̍k tsháiⁿ。I 感覺 lak tsiok 久--ê，過 beh 10 秒，電梯減速，慢速落 3 秒雄雄 tong-tiāⁿ，聽 1 聲頭殼頂 ê LED 寫 102。電梯門開--開，小玉 á 西瓜肉 hit 款黃色 ê 光 tshiō--入-來，部長 buē赴看外口生做 siáⁿ 款，kha-tsiah-phiaⁿ hō͘人大力 sak--出-去。電梯小姐 ê 聲講：「部長 kàu 位--ah，多謝！」
Buē赴想 i ná ē叫 i 部長，面 lòng tio̍h 軟軟 ê 壁，sīm--1-下，kui ê 人 hō͘粉粿做 ê 壁吸--入-去。頭--á i 伸手想 beh 擋看 mài，ē koh hō͘吸--入-去-無，án-tsuáⁿ pué lóng 無效。Pué 5、6 下，手 tuì 壁伸--出-去，kàu 壁 hit pîng--ah，開始身軀 àⁿ 進前，kha tsiok 大步 hāⁿ--出-去，kui tsiah 人 ká-ná tuì tshuì--e hông phuì--出-來。
房間內無壁，無 thô͘-kha，無天 pông，sì-kho͘-lìn-tńg 黃 ling-ling ê bông tah kui 四界，tú-á tuì toh 位入--去-ê mā看無，行進前踏ē tio̍h thô͘-kha，i 行 2 步 tong-tiāⁿ m̄敢 koh 行。1 kha 咖啡色 ê 箱 á tuì 黃霧內底浮--出-來，beh kàu kha 邊 tsiah 看有是 1 人坐 ê 牛皮 phòng 椅，kap i 讀冊間內底 hit 隻牛皮 phòng 椅生做 kāng 款。Kám 講 i ê phòng 椅 hông 偷 tshāi 來 tsia。
「坐！ He 是 lí 上愛坐 ê phòng 椅！當做家己厝--e，the hō͘爽快。」
Tsit ê tsa-bó͘ê聲 kap tī立法院 lòng--tio̍h hit ê tsa-bó͘ê聲 tsiok sîng。 I 照 i 講--ê，tī phòng 椅坐好勢。有人 tuì 頭前行--出-來，黃霧 tsa̍h--tio̍h，kan-na phú-phú ê 人影。行 khah uá tsiah 看有生 siáⁿ-mih 款。真正是立法院 hit kho͘ tsa-bó͘， m̄-koh 穿 China 古裝 tsa-bó͘長裙。
「Lí 是 siáⁿ-mih 人？」
「我 beh kā lí tàu-saⁿ-kāng！」
「C 教授？」
「Tio̍h！C 教授 ê tāi-tsì若是 pìⁿ 無好勢，lán 中國人 ê 前途ē tsiok bái！」
「我是 Lîng-bú！Lín 頭家選ē tiâu mā是我 kā處理--ê。」
「Gún 頭家....總.....統！！」
「Lín 是 án-ne kā叫，無 m̄-tio̍h。」
In 2 ê ká-ná 講真 tsuē話，m̄-koh tshuì lóng 無 tín 動，Lîng-bú 直接 kā i 想--ê 灌入去部長頭殼內，mā直接 tuì i 頭殼內知影 i beh ìn siáⁿ。I tng-teh 想講 tsit ê tsa-bó͘ m̄知是 siáⁿ-mih 碗糕，kám ē是 beh kā i 害。Tō隨有話灌--入-去 i 頭殼內。
「我 buē kā lí害，我已經 500 幾歲--ah，ē-sái 變做 lí 想 beh 看--tio̍h ê形。」
Lîng-bú 隨變做 tsiok 老 ê tsa-bó͘，過 1 下 á 久，衫無--去，2 粒奶下 kha 發 2 排奶出--來，ná 2 kuāⁿ 木瓜，tuì 胸坎 2 tsuā排 kàu 腹肚。鼻 á 變豬鼻空，耳 á 家己 suá 去頭頂....。
「Lí 想講我是 beh kā lí拐 ê 豬母，我 tō變 hō͘ lí看！」
「失禮--lah，tú-á 少年小姐 khah 好看...」
講了隨變做立法院 hit ê tsa-bó͘，穿 tsa-bó͘西裝。
好厲害 ê Lîng-bú
「C 教授 tsit ê 人一定 ài kā創 hìⁿ-sak。」
「我 hō͘ i 舞 kah 頭殼 tsiok 疼，lóng 無法度 kā hō͘ in píng--去-ê 改轉來 lán 中國正統！」
「我 60 年前叫 lín 老頭家去圓山 á 飯店，tō是 beh 破台灣神社 ê 局。1 tsuā橋 tshah tuì 劍潭，koh 有尾--á 高速公路橫--過-去，日本人 tī台灣起 ê 神格 kui ê 敗--去，m̄-koh lín 老頭家ê囝死了 tō開始無力，上 gâu 是tòng kàu 1999 年 niâ。Lín 細漢頭家死--去，大位 hō͘無轉去日本，藏 tī總督府，假做台灣人，koh 假做 kap lín kāng 黨 ê 日本 á 坐--去。 I ná 做 ná 設計 hō͘ lín sio-tak，hō͘台灣人起來亂，尾--á thiau-kang 放 hō͘ in 細漢--ê。」
「Tio̍h！！害 gún 艱苦 8 年，tsiah koh kā大位搶--轉-來，kā in 細漢--ê 掠去土城關，tshuā頭 long tng buē tio̍h。」
「Ǹg lín beh 搶大位轉--來真 oh--e！96 年 ê 時叫 lán tī北京 ê 人，用飛彈 kā 2 ê港封--起-來，háⁿ 看 in ē倒擔--無。我假做日本來 ê gâu 人，kā hit 陣佔大位 ê 日本人拐講起 tsit 支 101 大樓，ē-sái 破圓山 á 飯店 hit ê 局！日本人 tsiok 興世界上 kuân ê 大樓，起好日本人ē tsiok 愛來台灣，hō͘台灣 kap 日本強 beh 斷--去 ê 線結 koh khah ân！Án-ne 北京 hit pîng 若敢亂來 tōē hō͘美國 kap 日本做伙修理。In 聽 kah 信 phat-phat，lóng 總 khîng 300 幾億台票，去日本 tshuē專門起大樓 ê 公司設計，khong-khong tō kā起--落-去-ah！Kàu taⁿ 無人知，tsit 支 101 ká-ná 1 支利劍，tuì 台灣頭 tshiám--落-去，hō͘台灣人 kap 假做台灣人 ê 日本人頭殼 tiām--去，buē tín buē動。M̄-koh.... án-ne mā是無夠，頭殼 tsha̍k tiâu--e，koh 有 1 條神經線閃--過，suan--出-去，in koh 有法度 tī hia ngia̍uh-ngia̍uh-suan。」
Lîng-bú ná 講，邊--á 不時ē浮相出--來，kā i 講--ê mn̍gh-kiāⁿ phah tī黃霧頂頭，m̄知 tuì toh 位 phah--出-來-ê。
「Koh 有神經線？？？」
「Lín 頭家管台北 ê 時，叫 i tī Bâ-khang 起觀光流 lông，tō是 beh 釘 tsit 條 suan--出-去 ê 神經線。千交代萬交代講 m̄-thang 偷工，料 mā buē-sái 省，一定 ài tī 2004 年進前起好，i ta̍uh-ta̍uh-á sô，拖 kah 2004 年 tsiah 起好，工 mā beh 偷，料 mā beh 減，koh kā ba̍uh 去起 ê 法國公司抽。驚我 kā i 修理，tī 2004 年硬 beh 通車。紅毛 thô͘ iáu 未 ta，人 tō放入去 thún，liâm-mi tō害了了。 I 若照起工乖乖 á 做，lín 免艱苦 hiah 久。」
M̄-nā鐵柱地基 kui phiàn 崩了了 ê 相 phah tī黃霧，偷外 tsuē工，減外 tsuē料，koh 去 kā a-tok-á討 o͘-se ê相 lóng 放放--出-來。部長看 kah kui 身軀起畏寒。
「Bâ-khang 觀光流 lông，thiau-kang tuì 木柵仙公廟頭頂 hit tsuā線牽過去山頂，koh 去是新店、坪林，ē接 tio̍h 台灣 ê 龍骨「中央山脈」， tō是我講 tsit 支 101 tshiám 無 tio̍h ê hit 條神經線。木柵動物園開始，過仙公廟，thàng kàu Bâ-khang 是神經線 ê 上尾節。用流 lông ê 鐵柱 á tsha̍k--leh，in hia m̄-tsiâⁿ 人 tō無法度變鬼變怪！」
「莫怪ē kā廟起 tī hia！」
「仙公廟山頂有 hit 站 ê 地基直直 tuì 仙公廟頭殼頂 tshah--落-去，我有 kā交代講地基 ài 比別站加挖 3 倍落--去！Án-ne 仙公 koh khah gâu mā hō͘鐵支 á 釘死死！Lín lóng 想講地基人看 buē tio̍h tō hē性命偷。Hit 支 hō͘議員 iah--出-來 ê 柱 á，頂頭鐵支 á hiah kuân，地基 phah 無夠 3 米。若崩--去，流 lông ê uái-á-soh hiah 粗，kui ê 拖--落，ē kui 排倒了了！廟頭頂 hit kui 支 kāng 款釘無夠深，ka-tsài 08 年有人 teh 台灣人 hit pîng 配合，若無 lín tōài koh 食飯 kiáu 鹽。」
Lîng-bú 放仙公廟山頂 ê 相，電光 tshiō落去 thô͘下，地基 tsiah 5 米 niâ。
「若 2004 年 lóng 做好勢，日子看好勢， 2 pîng 做伙開幕，kui ê 勢 kap--起-來 tsiok 有力，上無ē-sái koh tòng 50 年，流 lông tshìn-tshái 做做--e，上好 ê 日子 tuì 無 tio̍h ，鐵柱 tshah 無夠深，kui ê 勢 ui--去，tsiok 無力，上 tsuē tòng 8 年。」
「8 年，tòng kah i 做 suah，án-ne koh 有時間。」
「Lí mài siuⁿ hang，古早台灣人趁有錢，tshìn-tshái lín beh án-tsuáⁿ lóng 無要緊。Tsit-má in 趁無錢，kui 腹肚火無 tè tháu，若 hō͘ in tshuē tio̍h 空 tōē pōng--出-來。若 hō͘ pong--出-來，世界 100 外國ē tuì tsit 空鑽入來 tshńg，中國ē hō͘ in tshńg kah 破糊糊！Tsit-má 有 1 空！」
「C 教授！！！！」
Lîng-bú 變做 C 教授 ê 形，分身散--出-去，kui 千隻、kui 萬隻一直散--出-去，kui 間房間 lóng 是 C 教授！
「我知--ah！！！為 tio̍h lán 中國，lí 講 siáⁿ 我 lóng 照做！」部長 ná khàu ná ìn。
Lîng-bú kā手 tah tī部長頭殼頂，ká-ná 全世界 ê mn̍gh-kiāⁿ lóng tuì i ê手灌入去部長 ê 頭殼內。部長 tòng buē tiâu，目睭 píng 白仁，人死死昏昏--去。起來 ê 時 the tī辦公室 ê 椅 á 頂。
Thâi 人免 kā thâi，i ē家己去死。
部長叫祕書入去辦公室，照Lîng-bú 灌 hō͘--i-ê交代 hō͘祕書。
「Khà電話 hō͘鄉土文學 ê N 大師，叫 i kia̋ⁿ 日來 tshuē--我，我有要緊 ê tāi-tsì beh kā i 交代。叫 tsit 張單內底 ê 人，mî-á-tsài 來開會，緊去聯絡！！Lóng ài tshuē tio̍h 人！」
祕書隨 piàⁿ--出-去，kā名單 copy 10 幾份，部內有上班--ê lóng 先 kā tng-teh 做 ê sit 頭放--leh，分頭聯絡部長列--出-來 ê 人。名單內底有 ta̍k 間電視台 ê 總經理、報社總編輯、台灣文學系 ê 系主任、研究所所長、中文文學界有名 ê 人。辦公室雄雄 ná 像海產拍賣場，無閒 kah beh píng--過！
「N 大師 tsit-má ti 北京...」
「叫 i 隨坐飛 lîng 機去東京，叫 1 台專機 tī Haneda[1] 等，i kàu 位隨 kā載--轉-來！」
暗時 11:00 N 大師 tuì 北京 piàⁿ kàu 部長 in-tau，部長 tshuā i 入去 i ê 讀冊間，叫 i 坐 tī hō͘ Lîng-bú 灌頂 ê hit t隻牛皮 phòng 椅，thîn 1 杯高粱--ê hō͘ N 大師 lim。
「是 siáⁿ-mih tāi-tsì tsiah 要緊，ài 1 kang 內 tuì 北京 piàⁿ--來？」
「是！先 mài 講話。」
部長去 kā音響 tsūn--開，「鄧麗君」ê 聲 tuì lá-pah 放--出-來，頭--á 細細聲，lú tsūn lú大聲，連牛皮 phòng 椅 to tuè 「鄧麗君」 ê 歌聲 teh tsùn，N 大師 tsiok 大聲講話，驚部長聽 buē tio̍h！
「Án-ne buē kā人吵--tio̍h？」
「無要緊，tsit 間隔間做 tsiok 好，外口聽 buē tio̍h。Lán beh 講 ê tāi-tsì tsiok 要緊，hō͘人偷錄--去 tō害--ah！」
I kāLîng-bú 講 ê tāi-tsì簡單講 hō͘ N 大師聽，m̄-koh 無講是Lîng-bú 講--ê，N 大師聽 kah tshuì-á 開開，想講 tsit ê 人真正是 gâu 人！
「Hit 空 beh án-tsuáⁿ 補？」
「Tse 是 1 ê thâi 人事件，無 tshìng，無刀 á，無藥 á，suah 尾 mā無人死！Beh thâi ê 是 C 教授 ê 人格 kap 台灣人 ê 前途！」
部長 kā kui 齣 beh án-tsuáⁿ 搬，1 項 1 項講 hō͘ N 大師知。頭--á ē設計 10 外場演講，lóng 是用文學做主題，上要緊 ê hit 場辦 tī台南 ê 台灣文學館，主題 tō是台語文教育，hit 場 ài hē性命 tsau-that teh 做台語教育 ê 人，lāng hō͘ C 教授 phuì 面 tshuē i 冤家。冤了隨 hō͘新聞報講 C 教授去亂 kiāu，新聞 24 點鐘 kā放。新聞放了，叫台文系 ê 老師連署講 i 無大無細，suà--落叫文學界(中文)寫文章 kā kiāu。 C 教授為 tio̍h beh 出名，來 tsau-that 台灣文學 se̋n-pái N 大師，tsiâⁿ-tsò『台灣文學界』新人 tak 老人 ê「倫理大悲劇」，中國人 ê 勝利！
「Lí tio̍h-ài hē性命 kā lāng，ta̍k ê舞台語文--ê lóng kā tsau-that--落，hō͘ hit ê phuì-that-á去 tshuē lí冤家，lí tsiah 用台語 kā tshoh 『操你媽的B！』上好褪腹 theh kā tsing！」
「Tsán！！我上 ài kā人 tshoh『操你媽的B』，tshoh in hia 是台灣人 koh khah 爽！」
「Kā tshoh lú phái 聽 lú 好！！Ǹg lí tī『鄉土文學』國寶級 ê 名聲，ta̍k ê lóng ē thīn--lí！！我 m̄知『操你媽的B』台語 beh án-tsuáⁿ 講，m̄-koh líài 用台語 kā tshoh『操你媽的B！』」
「我知！Lín pē是國寶！『操你媽的B！』án-ne tio̍h--無！」
N 大師講 suah，tsiok 歡喜 kap 部長乾杯，kui 杯高粱--ê 1 tshuì kā灌--落-去！隔轉工，名單頂頭 ê 人 lóng tī會議室聽部長 kap N 大師 koh 講 1 pái kui ê 計畫，khang-khuè lóng 交代落去，tsit 齣「台灣文學倫理大悲劇」tshuân 好好等 beh tī『台灣文學館』上台。
文學館演講廳
「In hia 舞台語文--ê lóng『不倫不類！』ài lán tsit 種正統 ê 中文 tsiah 是正港 ê 文學。」
Tsit 陣台 á kha 有人 khiā--起-來，gia̍h 1 張 tsiok 大張 ê 海報紙，頂頭寫講台灣人無 ài 用台語寫 mn̍gh-kiāⁿ，見笑！N 大師看--tio̍h tō知影是 C 教授！Lú 講 lú 超過，kā i 知影有 teh 舞台語文--ê，1 ê 1 ê 名唸出來 tsau-that。
Gia̍h 海報--ê tō是 in teh 講 ê hit ê phuì-that-á，其實 i 是台南 S 大學 teh 教台語--ê，tsit 2 年為 tio̍h 台語文 tiāⁿ-tiāⁿ làu 人去 kā部長 tshiàng 聲，辦公聽會叫立法院委員 lia̍h 部長去立法院罰 khiā，算是舞台語文--ê tsit 2 年 á 上 tshìng ê 人！I tī台 á kha 大聲 kā N 大師 lióng，問 i 是 án-tsuáⁿ 烏白 kā人 tsau-that！
N 大師看魚 á uá 來 teh tshuah--ah，koh kā釣 á tshuah khah 大力--e，看ē-sái kā tsit 尾 gōng tāi-á拖--起-來-無。
「Lí 是 siáⁿ-mih 人？」
「我是 CXX！」
「CXX！『我操你媽的B！』」
N 大師 tshoh 了 tō kā衫褪--起-來，beh tsông 落去台 á kha！工作人員緊 uá 過去 kā tòng。
「Lí 是 án-tsuáⁿ 烏白 kā人 tsau-that！」
現場 ê 人用北京話 huah：「『出去！！』」聲 tsiok tsuē，buē輸兵 á teh huah 口號，hia--ê lóng 是 kap N 大師做伙來文學館--ê。N 大師看現場熱 phut-phut，暢 kah lia̍h buē tiâu！ Koh kā C 教授 tshoh。
「『S大的教授啊.... 會叫的野獸！』」
C 教授 khiā tī台 á kha，工作人員 án-tsuáⁿ sak to sak buē行，kui 身軀 peⁿ ân-ân，ná tshah tī thô͘-kha buē-tín-buē動。目睭 ná to̍h 火 teh gîng 大師。N 大師 hō͘ gîng kah 火 mā to̍h--起-來，koh tshoh 1 pái『操你媽的B』beh 衝去 kā tsing，工作人員知影若 hō͘ i 先出手 kā C 教授 bok--tio̍h，kui 齣 tō去了了--ah，kā大師 tòng tiâu-tiâu！Hit kang ê 演講 tōán-ne 散場，hì-hé 叫真鬧熱！M̄-koh tāi-tsì iáu 未 suah！
100 支機關 tshìng 做伙 phah
Hit 暗，ta̍k 間電視、新聞 lóng 隨放 tsit 條新聞，加加--e lóng 總百外條！電視照 3 頓放 koh 無夠，半暝 á mā放落去 tàu， ta̍k ê報紙頭版 lóng tsit 條。雜誌 mā出號外，做 tsit ê 事件 ê 專題。
『C 教授鬧場！鄉土文學大師怒罵五字經！』
『大師演講，C教授鬧場』
『談台語文遭嗆可恥 大師脫衣欲揍C教授』
『談台語文遭嗆大師：S大怎有這種教授？』
『C教授的政治前途無可限量！』
『C教授嗆前輩大師』
『C教授舉海報嗆大師，大師飆髒話嗆C教授』
S 大學台文系發聲明講 C 教授 tī in 系是怪人，i tī外口舞--ê kap in 無 ti-tāi，1 kuá 聽講是文學家--ê mā tī報紙，家己 ê Blog，網站寫文章 kiāu C 教授。C 教授雄雄變做無大無細，ài 亂 kiāu，buē見笑 ê 代表！
Kàn-lín-niâ tsi-bai？
Kui 齣舞 kah tsiah 鬧熱，台灣 lóng kioh 是 C 教授 hông tshoh 台語 ê 『五字經』，感覺 N 大師 tshoh 了有道理。過 1 禮拜，tī網路頂有 1 teh 大師 tshoh C 教授 ê 片 á。放--出-來-ê m̄是台語 tshoh-kàn-kiāu，是 1 ê China 人用 China，捲舌捲 kah tshùi 舌 beh phah 結ê『CXX！操你媽的B！』N 大師放 ê 火，hō͘風 siàn 倒轉。台灣人 hō͘ China 人 tshoh，聽--tio̍h long tsiok tu̍h-lān，lú 來 lú tsuē人知影 hit kang in án-tsuáⁿ tsau-that 台語文 ê 專家，尾--á lóng thīng C 教授。
部長坐 tī電腦頭前『操你媽的B』一直 replay。I 心肝內想講，去--ah！空破--去-ah！
留言列表