Ai Tai-bun News

海芋扁食(餛飩)

Hái-ō͘ hoa hêng ê pián-sit

(台羅文) 

Goá ū chi̍t-ê koài-phiah, tio̍h-sī ài chiah ū pau āⁿ ê mi̍h-kiāⁿ(si̍t-bu̍t), chhiūⁿ bah-oân, chúi-kiáu, gio-za (gyoza/chian-kiáu), tong-jiân iah-koh-ū pián-si̍t. Téng-kang tī Tâi-oân khoàⁿ tiān-sī kong ū chi̍t-ê ma-ma kā pián-si̍t choe seng hái-ō͘ hoa ê chō-hêng lâi hō͘ i-ê kín-á ē ài chiah so͘-chhài. Lî-chhiáⁿ, koh hoat-tian kàu iōng bāng-lō͘ choe seng-lí lâi chhù phoè pián-si̍t.  It-ti̍t liām kong beh kap gún a-bú chhoē chi̍t-kang kà-ji̍t lai chhì-bāi. Liām kúi-nā kô goe̍h, siuⁿ kè pîn-toāⁿ long m̄-bat si̍t-hiān. Hit-kang, siong-tioh, hèng-chhì-chhì, má-siōng chhoē bāng-lō͘, oh choè-hoat, cheng kúi-kang boé tioh pián-si̍t phoê tioh kā-i chhì-choe chhut lai lo.

Í-hā ê hūn-liōng sī ē-tàng choe 20 ki hái-ō͘ pián-si̍t ê chhâi-liāu:

āⁿ:

100g ê tu-bah, ká-bah

2 toa-thng-sî ê iû-chhang

Iâm kap peh hô͘-chio hún

Pián-si̍t ê pō͘-hūn:

20 tiuⁿ pián-si̍t phoê

20 ki lô͘-sún, soé-kè, kián kè

Ùn-liau:

Kiuⁿ-si

1 toa-thng-sî ê peh chhò͘

1 sè-thng-sî ê moâ-iû

1-2 toa-thng-sî ê tāu-iû

choè-hoat:

1. Tu-bah kap iû-chhang khǹg leh toa-oáⁿ, lām ho͘ chiâu-ûn, ka iâm kap peh hô͘-chio-hún chhiám kiâm tiⁿ.

2. Pau choe hái-ō͘ ê hêng: siōng khùn-lân ê pō͘-hūn

  a. Theh chi̍t tiuⁿ pián-si̍t phoê, boah āⁿ tī bīn-téng

  b. pián-si̍t phoê tùi-áu choe saⁿ-kak hêng (nn̄g pêng kâng-khoáⁿ tn̂g), khǹg chi̍t ki lô͘-sún tī pián-si̍t ê tiong-ng, lô͘-sún hoe hiòng saⁿ-kak-hêng ê chiam-kak.

  c. Tò-pêng ê kak pau kè-lâi chiàⁿ-pêng, boah chi̍t-tiám-á chúi liâm leh āu-pêng, chiàⁿ-pêng ê kak pau kè-lâi tò-pêng, boah chi̍t-tiám-á chúi liâm leh āu-pêng.

3. Iōng kún-chúi sa̍h pián-si̍t; mài sa̍h siōng kú, pián-si̍t phoê ê kô͘ khì

4. Ùn-liau lām hó.

5. Sio kiaⁿ hiông!

(漢羅)

我有一個怪癖, 著是愛食有包餡的物件(食物), 像肉圓, 水餃, gio-za(gyoza/煎餃), 當然益閣有扁食. 頂工佇台灣看電視講有一個媽媽kā扁食做成海芋的造形來予伊的囝仔會愛食蔬菜. 而且, 閣發展到用網路做生理(生意)來厝配(宅配)扁食. 一直唸講欲及阮阿母尋一工(找一天)假日來試bāi(試試看). 唸幾若個月, siuⁿ過貧惰(太過懶惰)攏毋捌(未曾)實現. 彼工, 想著, 興熾熾, 馬上尋網路, 學做法, 前幾工買著扁食皮著kā伊試做出來囉.

以下的份量是會當做20枝海芋扁食的材料:

餡:

100g的豬肉, 絞肉

2大湯匙的油蔥

鹽及白胡椒粉

扁食的部份:

20張 扁食皮

20枝 蘆筍, 洗過, 撿過

搵料:

薑絲

1大湯匙的白chhò͘

1細湯匙的麻油

1-2大湯匙的豆油

做法:

1. 豬肉及油蔥khǹg leh大碗, lām乎齊勻, 加鹽及白胡椒粉

2. 包做海芋的形: 尚困難的部份

  a. 提一張扁食皮, 抹餡佇面頂

  b. 扁食皮對拗做三角形 (兩爿仝款長), khǹg一枝蘆筍佇扁食的中央, 蘆筍花向三角形的尖角.

  c. 倒爿的角包過來正爿, 抹一點仔水粘leh後爿, 正爿的角包過來倒爿, 抹一點仔水粘leh後爿.

3. 用滾水煠扁食; 勿煠尚久, 扁食皮的糊去.

4. 搵料lām好.

5. 燒驚狠!

問: 請問大家家裡也會講【燒驚狠】(Sio kiaⁿ hiông!)嗎? 在我家，我媽媽會這樣說耶，每次她煮好熱騰騰的食物，咕嚕咕嚕吃下去，可是很燙，她就會說Sio kiaⁿ hiông!不過，外國有研究說，還是不要吃太燙的食物，對食道不好唷!