Ai Tai-bun News

Lâng-kheh m̄-thang gō͘-hoē! Goá m̄-sī teh tián goá ka-kī hip-siōng ê ki-su̍t.

Goá sī teh o-ló poe Hui-hêng-soàⁿ ê Bí-kok soán-chhiú, in tuì 1-bān khòng 5-pah eng-chhioh koân ê thiⁿ-téng thiàu--lo̍h-lâi!

Siáⁿ! Lí teh bn̄g kóng in án-choáⁿ thiàu--ê, sī--bô?

In m̄-sī sîn la! Lâng in sī chē ti̍t-seng-ki, poe kàu bān-goā eng-chhioh koân ê so͘-chai hō͘ in thiàu--ê-la!

Tāi-seng in sī chū-iû lo̍h-thé ê sok-tō͘ lak--lo̍h-lâi, tī thiⁿ-téng piáu-ián te̍k-ki, phì-jū in 5-ê-lâng, goá giú lí ê kha, lí giú pa̍t-lâng ê kha, án-ne uî chò 1-ê îⁿ-kho͘-á, thàn hong-sè chiàⁿ se̍h 1-lìn, hoan-sin koh sio giú, tò se̍h 1-lìn. Tī 15-bió lāi-té piàn jú-chē pō͘-sò͘, hun-sò͘ tō ē jú-koân, Koh lâi tō ta̍k-ê soàⁿ-khui.

Lí bn̄g goá kám-ū chhin-ba̍k khoàⁿ--tio̍h! 3-8 hiaⁿ-tī, goá bô hiah gâu la! Chiâⁿ bān eng-chhioh koân, beh án-choáⁿ khoàⁿ ē-tio̍h, chit-ê in-toaⁿ goá kóng hō͘ lí thiaⁿ. In ū 1-ê choan-bûn ê liap-iáⁿ-su, mā-sī poe hui-heng-soaⁿ--ê kā in lio̍k-iáⁿ, thong-koè bô-soàⁿ-tiān thoân kàu thô͘-kha, tuì toā-ê gîn-bō͘ pàng--chhut-lâi, goá chiah khoàⁿ--tio̍h-ê la!

In lak--lo̍h-lâi lî thô͘-kha chha-put-to chiâⁿ chheng eng-chhioh, chiah kā hui-hêng-soàⁿ giú hō͘ khui, 1-ê 1-ê chhin-chhiūⁿ thiⁿ-téng ê hoe-luí, 1-luí 1-luí hiông-hiông pok--chhut-lâi, koh thàn hong-sè bān-bān-á phiau--lo̍h-lâi. Ū-kàu suí--ê la!

Chiah-ê Bí-kok hui-hêng-soàⁿ teh beh kàu thô͘-kha ê sî, koh pâi tuī-hêng, hō͘ ta̍k-ê siâng sî-kan lâi ta̍h-tio̍h thô͘-kha, ū kàu suí-khuì!

Chit-tiuⁿ siōng sī Ko-hiông Sè-ūn hui-hêng-soàⁿ pí-sài hip--ê.