Ai Tai-bun News

奇妙味覺: 煙燻鮭魚+草莓

Sin-kî ê chu-bī: âng-liân-ian + chhì-m̂ ê sa-lah

新奇的滋味: 紅鰱煙 + 刺莓 的沙拉

Chit chhut chhài khó-lêng ài ū chi̍t-koá ióng-khì lâi chhì-chia̍h.

Tē-it-pai khoàⁿ-tioh chi̍t-ē si̍t-phó͘, goá mā-sī bô-pān-hoat sióng-siōng kā âng-liân-ian kap chhì-m̂ khǹg chò-hoé chiah khí-lâi ē sī siáⁿ-mi̍h bī.

Ka-kī choe-kè liáu-āu, chit nn̄g-bī phoè khí-lâi bô hiah kî-koài là!  Na ū chhiáⁿ-lâng-kheh, ē-tàng iōng chit chhut ho͘ ài sin-kî kau-bī ê pêng-iú chhì-khoàⁿ-māi!

這出菜可能愛有一寡勇氣來試食.

第一擺看著這个食譜, 我嘛是無辦法想像kā紅鰱煙及刺莓khǹg做伙食起來會是啥物味.

家己做過了後, 這兩味配起來無hiah奇怪啦! 若有請人客, 會當用這出乎愛新奇口味的朋友試看覓!

Nn̄g-lâng hūn ê chhâi-liāu:

Sio-hoê-á ê chhài-khok, chha-put-to poan liap

(nā-sī bô sio-hoê-á ê chhài-khok, ē-ēng-leh iōng chhang-thâu tāi-thoè; pún-lâi chhang-thâu kap âng-liân-ian tioh chiok hah-bī)

chìⁿ chheⁿ-chhài (tiong-bûn sī 芝麻菜)

(chìⁿ chheⁿ-chhài bī khah chhiùⁿ, m̄-bián iōng siuⁿ-chē)

chhì-m̂, 10 liap

âng-liân-ian, 100g

兩人份的材料:

小茴仔的菜khok, 差不多半粒

(若是無小茴仔的菜khok, 會用leh用蔥頭代替; 本來蔥頭及紅鰱煙著足hah味)

箭生菜 (中文是芝麻菜)

(箭生菜味卡chhiùⁿ, 毋免用siuⁿ多)

刺莓, 10 粒

紅鰱煙, 100g

Chiùⁿ-liāu:  醬料:

Kan-á iû, 2 toa-thng-sî  橄仔油, 2 大湯匙

Peh phû-tô-chiú chhò͘, 1 toa-thng-sî  白葡萄酒chhò͘, 1 大湯匙

N̂g-sek ê wasabi, 1 sio-thng-sî  黃色的wasabi, 1 小湯匙

Phang-bi̍t, 2 sio-thng-sî  蜂蜜, 2 小湯匙

Choè-hoat chin kan-tan:

1. Kā sio- hoê-á ê chhài-khok chhiat choè chi̍t-si chi̍t-si, chhì-m̂ chhiat chi̍t-chiu chi̍t-chiu; âng-liân-ian ê pau-chong thiah-khui, khoàⁿ sī-beh iōng chhiat-leh a̍h-sī iōng chhiú liah choè chi̍t-phiⁿ chi̍t-phiⁿ。Kā chit saⁿ-chiòng chhâi-liāu kap chìⁿ chheⁿ-chhài sûi-ì pai-leh poâⁿ-á lāi.

2. Iōng lēng-goā chi̍t-ê sè ê oáⁿ, kā só͘-ū ê chiùⁿ-liāu ê chhâi-liāu khǹg chò-hoé, lā hó chiâu-ûn.

3. Beh chiah chin-chêng, chiùⁿ-liāu lâm-leh chhài-se ê bīn-téng tioh ē-sái.

做法真簡單:

1. kā小茴仔的菜khok切一絲一絲, 刺莓切一chiu一chiu; 紅鰱煙的包裝拆開, 看是欲用切leh抑是用手liah作一片一片. Kā這三種材料及箭生菜隨意擺leh盤仔內.

2. 用另外一個細的碗, kā所有的醬料的材料khǹg做伙, 撓好齊勻.

3. 欲食進前, 醬料淋leh菜蔬的面頂著會使.