Ai Tai-bun News

8/13 Kî-san/Lāi-mn̂g

Kok chai-khu nā-ū su-iàu, chí-iàu 1 thong tiān-oē, Ko-hiông chhī-hú tō ē kā kok-kài kià-hù--lâi-ê bu̍t-chu iōng kong-chhia ūn-sàng kàu chai-khu khì.   Chit-ji̍t ê bo̍k-tek-tē sī Lāi-mn̂g, beh khì lāi-mn̂g tō ē seng keng-koè Kî-san.

M̄-kú in-uī ùn-chiàng lō͘-hóng bô sek, kok-tō 10 hō sài kàu-té, lo̍h-lâi chiah khoàⁿ-tio̍h thàng khì Kî-san ê Sin-kî-boé kiô hō͘ toā-chuí chhiong-tn̄g, hong--khí-lâi ah. Kiat-kó chí-hó se̍h-thâu, khau 1 lìn ū kàu toā lìn--ê, se̍h tńg-khì kàu Iàn-châu chiah ū hoat-tō͘ hoan-thâu.

Chit-pái Kî-san ē hiah giâm-tiōng sī in-uī Kî-san-khe ê poh-hoāⁿ ū 1 koe̍h pang--khì, toā-chuí chőng án-ne im--ji̍p-lâi.

Nā ka̋ⁿ im-chuí iáu bô-táⁿ-kín, chuí thè liáu soah kui-ê lóng lo̍k-kô͘-á-moâi.  Che tō sī Kî-san kap goā-kài kau-thong tiong-toān ê goân-im.

Nā bô chit-kuí-kang ê chheng-lí, seng kā chú-iàu tō-lō͘ ê noā-thô͘lóng chheng cháu, liân Kî-san tō bô châi-tiāu ji̍p-khì, koh khah bián-kóng beh sàng bu̍t-chu khì Lāi-mn̂g--a.

Iân-lō͘ ū bē-chió A-peng-ko teh tàu piàⁿ-sàu.

In-uī Lāi-mn̂g tē-sè khah koân, chit kái hong-chai bô siū-tio̍h siáⁿ-mih éng-hióng.  Ē-kha sī Lāi-mn̂g Sūn-hiân-kiong(Tī Si̍t-chiān Tāi-ha̍k ko-hiông hāu-khu hū-kīn niâ).  Piⁿ-á ê hiuⁿ-kheh toā-lâu siu-liû bē-chió chai-bîn.

Tán bô chhin-lâng ê siau-sit.

Lāi-mn̂g Chí-tek-sī mā an-tah pah-kuí-ê chai-bîn.

Sòng-kang-tìn tō sī tī chia chhia-piàⁿ--ê.  Biō-tiâⁿ sī koan-chiòng khia ê só͘-chai, koh khah lo̍h-khì tō sī pí-sài ê tiûⁿ-só͘.

Sui-bóng lō͘ sī seng chhiúⁿ-thong--a, m̄-kú siang-pêng piⁿ-á ê khiā-ke tō...  Í-keng tē 5 kang--a-neh.

Bô goā-hn̄g tō 1 tui 1 tui pùn-sò, siū toā-chuí sńg-tn̄g ê ka-kū.

Chì-kang ta̍k-ê lóng bô-êng chhih-chhih.

Hāng-á lâi ê chêng-hóng

Chit-tui thô͘ ē-sái hō͘ tha̍k iù-tì-hn̂g ê kâu-sí-gín-á chhio̍k kah thiòng, in kám boeh? 

Chéng-kô ê chêng-hêng ta̍k-ê khoàⁿ siōng tō chai--a, goá tō mài siuⁿ kāu-oē.

A-mih-tō͘-hut...